Реферат: Тёжа иетне гайгиця пингень тешкст

Тёжа иетне – теке шкань кивчкадема,

Тёжа иетне – гайгиця пингень тешкст.

Тёжа иетне – вейсэндямос тердема,

Сынь палыть теке валдо уцяскань тештть.


Меельце шкасто ламо мель явови ютазь тиринь исторической шкатненень. Ведь ансяк эсь ютазенть содыцянтень строяви сыця шкась.

Мокшэрзятнеде васенце сёрмадовксонть появамодо мейле, конась пачкодсь минек видьс, ютасть уш тёжа колмосядт иеть. Сонзэ сермадызе Иордан монахось. Ды кавксосядт иеть, кода мордвась понгсь древнерусской летопистнес.

Минек раськетне эрясть Поволжиясо, чивалгома ёнов Рав лейденть. Тосо виртне полавтовильть лугасо ды болотасо, кандсть ведест лейтне: Окась, Цнась, Сурась, Мокшась. Виртнесэ кассть секеть жо чувттнэ, конат касыть нейгак: килейть, тумот, кузт.

Мордвась кандови финно – угорской народтнэнь группантень. Истя жо тей кандовить карелтнэ, венгратне, хантытне ды ламо лият. Зярдо – бути сынь эрясть вейке таркасо или, лиякс меремс, ульнесть вейке раськекс. Мейле весе народтнэ кармасть явовомо вейкест - вейкест эйстэ. Аламонь – аламонь полавтовсть коест – кирдаст, келест. Веенстнэ эрясть шабрацек, лиятне васов кадовсть раськест эйстэ. Ламо полавкст ульнесть теезь лия раськетнень мордвань территориянтень самсто.

Истя, ютасть уш тёжа иеть, кода мордвань чивалгома енксонь ды якшамо енксонь границятнесэ появасть славянтнэ. Сынь ульнесть рузонь, украинань ды белорусонь народонь раськекс ды весе вейсэ лововсть Киевской Русекс. Рузонь князтне Святослав ды Владимир тейсть поход Ока ды Рав лейтнень лангс. Теде мейле прась Хазарской каганатонть виесь, ды мордвась неизе олячинть. Сеть народтнэ, конат эрясть Цна ды Вад лейтнень чирева, совасть Древнерусской государствантень. Теде мейле мордвань касомась, эрямось ульнесть сюлмазь Российской государстванть марто.

Тёжа иеть минек народось ояксчисэ эри Россиянь лия народтнэнь марто. Те пек вадрясто невтеви эрзянь поэттнэнь ды писательтнень произведениясто, косо сынь невтить кеме ялгаксчинть, лездамонть рузонь народонть пельде. В. К. Радаевень перанзо алдо лиссь поэма «Сияжар». Сонзэ эйсэ авторось ёвтни, кода эрзятне рузонь богатыртнень марто вейсэ изнизь Рав лангсо саезь ятонть. Сонзэ невтемасо мереви, што эрзятне ансяк рузонь народонть лездамонзо вельде, сонзэ марто ояксчисэ эрязь, олякстомтсызь ды вантсызь те масторонть эрьва кодамо душмандо. Родинанть кисэ аштемась, сонзэ ванстомась – народонь вейсэнь ине долг.

- Паро Слава те, - Нуя ёвтнесь тенст,

Сивой айгоронть лангсонть невтизе, -

Рузонь масторонь виев аля сон,

Аволь пелиця, лиянь жалиця.

А те – ялгазо, - тонань невтизе, -

Волга лемезэ. Эсест тевс сынь мольсть.

Минек маримизь авардемадо,

Кежев душмантнэнь азнокшномадо.

Ардсть ды идимизь, оляс менстимизь.


А. К. Мартынов «Монь ялгам» поэмасонть невтизе, кода кемексты минек ломантнень ялгаксчись фронтонь китнесэ. Тесэ теевсть ялгакс рузтнэ, эрзятне, татартнэ. Те ояксчись лездась изнямс ятонть. Но те ояксчись, вечкемась умок эрясть весень седейсэ. Ней жо те вейсэнь мелесь топавтовсь.

Россиянь Президентэсь Указсонзо лемдизе 1000 иетнень тешкстамонть Весе Россиянь народтнэнь кенярксчикс, мокшэрзятнень – государствань теиця раськекс. А В. В. Путин тешкстызе мокшэрзянь раськенть, кода финнэнь – угрань сехте покш раськетнестэ вейкенть, кона ламо пингень перть славянской племенатнень марто вейсэ аштесь государствань теемань юрокс. Алкукс, 1000 иетнень кенярксчись эрявикс ды питней весе Россиянть туртов. Седеяк паро ды лезэ сон канды минек республикантень. Весе арсезенть топавтомась лезды целанек республиканть кемекстамонтень.

Эрзянь кезэрень вейке моросо улить седейс токиця истят валт: «Вейсэ, эрзят, виевтяно, вейсэ, эрзят, мазыйтяно». Кунсолат моронть, алкукскак мельспаро сайтянзат. Валтнэяк эйсэнзэ виевть, музыкаськак мазый. Ледстявсь морось, койсэнь, секс, мекс финнтнэ – угратне покш вий, зярдо пурнавкшныть вейс. Сынст тевест парт, мелест – бажамост мазыйть, кемевтицят.

Меельце шкастонть ламо тееви республикань томбале эриця эрзятнень ды мокшотнень малавгавтоманть коряс. Кеме сюлмавкст теевить промышленностьсэ, велень хозяйствасо, седеяк пек – культурасо. Стявтовить ояксчинь алкуксонь кеме сэдть. Малавгадыть раськень ломантне. Кемезевить эсь вийзэст, чачить оймезэст валдо мельть – арсемат, бажамот. Те секс, што минь вейсэ, ялгаксчисэ эрятано рузтнэнь марто.


Тёжа иень трокс эскелинек минь вейсэ, -

Рузт, мурома, мерят, мокшот ды эрзят.

Гувнось минек туртов чипаесь менельсэ,

Казсь палыця иеть тенек кеменьсядт.


Меельце шкасто Мордовиясь, васняяк, Саран ошось, теевсь куншкакурокс, ков секе тев пурнавкшныть малавикс раськень ломантне. Тень тагояк невтизе финнэнь – угрань раськетнень IV – це съездэсь. Покш кенярксокс ульнесь Международной финно – угорской фестивалесь «Шумбрат, Финно – Угрия!», конаньсэ ульнесть тёжа кавтосядт инжеть Венгриясто, Эстониясто, Финляндиясто, Российской Федерациянь финно – угорской республикатнестэ, истя жо сеть регионтнэстэ, косо эри мордвась.

Та - кода уш тонадовсь: спортсо якамонь коряс минек спортсментнэ свал лиснить икелев. Мордовиянь олимпиецень анокстамонь центрась а стяко ловови весе модамасторонть лангсо сехте виевекс. Секскак пельденек свал учить сырнень медальть. Ютазь иень умарьговонь куншка видьстэ Россиянь весе телеканалонь экрантнэстэ секе тев неявсть Борчин Валерань ды Каниськина Ольгань чачост, мизолдыцят, валдонь максыцят, уцяскавт.

Ламо кеняркс кандсь сеяк, што те иестэ олимпиадасо панжозель шкинемань секциясь. Аволь покш, ялатеке изнявкс! Кеман: те кирьвазтьсы сёрмадомантень бажамонь толнэнть.

Россиясо, ансяк Россиясо,

Гайгезь гайги тиринь эрзянь келесь.

Сонзэ эйсэ кортат – ёжось касы,

Сонзэ эйсэ морат – ливти мелесь.

(А. Доронин)


Мероприятиятне, конат ютавтовить неень шкасто, покш путовкс теить аволь ансяк финно – угорской культурантень, но и весе Россиянтень. Россиясо ламо мель явови ды карми явовомо национальной культурань развитиянтень. Эрьва народось, эрьва вишине этнической группась мари эсь прянзо Россиясо кода тиринь. Эрьвась соды, што тиринь кудось вейке, ды лия истямо а ули.

Минь, эрзя – мокшотне ды Россиянь лия раськетне, кенярксчинтень анокстамонть ды ютавтоманть пингстэ седеяк домкасто чарькодьсынек: вейсэ ды вейке – вейке марто ладязь эрятано 1000 иеть. Ды ансяк истя эрязь ультяно виевекс ды уцяскавокс. Ансяк вейсэ тенек ванстови ды кемекстави минек ине тиринь ёнксонок – Россиясь!


Минь вейсэ эрятано мартот, Россия,

А велявты мекев виде минек кись.

А эряви миненек уцяска лия,

Маней валскеть кази тенек вандынь чись.