Реферат: Кои жителствующим, иноческаго чина общежителем, архимандритом, и священноиноком, и честным монахом, и инокиням всем, сестрам нашим, и прочиим тщателем церковным

КНИЖКА

ИОАННА МНИХА ВИШЕНСКОГО ОТ СВЯТЫЯ АФОНСКИА ГОРЫ

В НАПОМИНАНИЕ ВСЕХ ПРАВОСЛАВНЫХ ХРИСТИАН, БРАТСТВАМ И ВСЕМ БЛАГОЧЕСТИВЫМ, В МАЛОЙ РОССИИ В КОРОНЕ ПОЛСКОИ ЖИТЕЛСТВУЮЩИМ, ИНОЧЕСКАГО ЧИНА ОБЩЕЖИТЕЛЕМ, АРХИМАНДРИТОМ, И СВЯЩЕННОИНОКОМ, И ЧЕСТНЫМ МОНАХОМ, И ИНОКИНЯМ ВСЕМ, СЕСТРАМ НАШИМ, И ПРОЧИИМ ТЩАТЕЛЕМ ЦЕРКОВНЫМ. БЛАГОДАТЬ ГОСПОДА НАШЕГО ИСУСА ХРИСТА И ЛЮБЫ БОГА ОТЦА И ПРИЧАСТИЕ СВЯТОГО ДУХА БУДИ СО ВСЕМИ ВАМИ. АМИНЬ.

 

[По изданию И. П. Еремина, М.-Л., 1955 г.]

 

Посылаю вам термину о лжи, которая над истинною у вашей земли царствует, и Бог от всех сторон и частий христианства хулится, духи ж лукавии поднебеснии (к ним же нам брань, по Павлу) в християнстве нашем владеют, отнюду же за неверие и бесплодие наше попущени есмо в запустение з нашею правъславною верою. И если ся не почуете и не справите, знаючи да знаете, яко и в конец благочестие наше запустеет, оставшии ж в безверии вси погибнут. Уготован бо сосуд гнева Божия на вашу землю пролитися, чому забегайте покаанием и исправлением вашим яже ко Богу скоро. Понеж несть незбожнейшее, хулнейшее, и несправедлившее, и нечистшее земле ни в поганьстве, як же ваша земля. Прото, молю вас, спасайтеся образом Лота, избегша из Содомы во Сигоре, — Сигор ж ест покаяние и очищение от греха — сицевым образом, яко ту последи о очищении церкви реклося, найдете. А егда сие исправите, чаю на милость Божию, яко призрит на нас паки милосердным оком и благочестие наше въздвигнет, и всех, в нем благочестно живущих, спасет, и царства небеснаго наследниками быти сподобит, еже нам всем получити, Господи, дажд. Аминь.

Сию же термину, начисто преведши, и иншим всем знати о том дайте, понеж не о лычко или о ременец идет, але о целую кожу, се ест о спасение душ наших и да не погибнем и дочасне и вечне от Бога жива.

 

В грешницех от всех пръвейший,

Во злобе от всех прелукавейший,

В страстех от всех безчестнейший,

В злонравии от всех богатший,

В вере же от всех неменший,

И в покаянии не последнеший,

 

Спасения вашего вам истинный желатель, Иоан инок з Вишне от святое Афонское горы... рукою власною писал.

 

^ ОГЛАВЛЕНИЕ ПИСАННОГО В КНИЖЦЕ... КРАТКОСЛОВИЕ

 

1. Обличенне диявола-миродрьжца и прелестный лов его века сего настоящаго.

2. Писание до князя Василия и всех православных християн, ознаймуючи, як въсточное веры вернии на опоце или на камени веры Петровы неподвижно и непрелестно стоят, и врата адова их одолети никакоже не могут, прочии ж вси отпали в прелест, заблудили и в ад адовыми враты затворени сут; в нем же и погреб неверию папы рымскаго и ему последующих.

3. Порада, како да ся очистит церков Христова, заплюгавленная лживыми пастыри и нечистым житием оных и всех им последующих, и которий смрад поганский възлонравствися в християнех; зде и о поруганию иноческаго чина от светских и мирскаго жития человек и что ест тайнство иноческаго образа... рия и прочая.

4. Писание до всех обще, в Лядской земли живущих, да ся покают к Богу, показуючи, каковы плоды Лядское земли жителей.

5. Писание к утекшим от православное веры епископом о имени згоды в книжках от них выданое, показуючи, яко тая згода не таковыми, яко ж они, безплодными в вере и житии, чинена и еднана быти мает, но святыми и духовнаго разума достигшими, и на прочая хулы, лъж и клевету, от них на благочестие и ему последующих рыгненую, отповед и обличение. откуду сию мудрость и разум постигли, которым так безбожне мудрствоватися отрули.

6.  Извещение краткое о латинской прелести, заблуждении от пути истиннаго, лжи и хоробе смертоноснаго и погибелию вечною смръдяаго мудрования... еже о вере, о церкви, о началстве, о ложном чистцу и прочая.

7.  О еретикох, что ест имя «ересь» и что «благочестие».

8.  Загадка философом латинским.

9. След краткий, привъдящий к постыжению и изучению художества, привъдящаго ко царствующей безсмертной и вечной правде.

10. Новина, или Вест, о обретении тела Варлаама, архиепископа охридскаго града, в граде Велис убитаго и в реку Вардар въвръженнаго.

 

^ О ЧИНУ ПРОЧИТАНИЯ СЕГО ПИСАНИЯ

 

Пръвъе убо да будет прочитател искусен, в чтении беглый и быстрый в зраку, не повтаряючи и заикаючися на одной речи два крот или три, але в меру ровно словом по пути речений изображенных да ступает, на запятых мало застановляется, а на точках, прошедше две-три или колко может въместити точок, паче же где бы ся речение разумения кончило, там духови да отпочивает, отдыхает и постоювает, ато для того, абы и простым безкнижным слухачом разум реченых явлен и въместен был.

Второе, съборно съзвавши братию правъславных в школу рано по проспании нощном, доколя еще молва мирская смущение и попечение на мысль бодрую и здравую не възыйдет и не оболеет промыслом земным и доколя еще чрево не наладовано гноем снедных, тогда да ся читает.

Третие, не обременяти слухи немощных многочтением, но власт тридесят или болше листков прочитати, та же кончати и, закладку заложивши, на другий поранок слухачов на таковый же пир и чест духовную просити, и так, поранок поранками проходячи, дондеже съвръшит пир книжного речения, събрание умолити, яко да наченши и съвершат слуханием здравое и трезвое мысли, что же приобрящут отсюду, мню, сами искусом уведят, если добре выслухают.

Тобе же, прочитателю, трудолюбия ради от Владыки Христа будет мзда болшая стокрот, нежели твой труд. И тобе, священиче, за събрание събора вторая равно постигнет. Аще ли же сам поревнуеши и пръвую въсхитити, сам собою потрудитися, се ест и прочитати и братию събирати, не зазрим ти сего приобретения талантоплодного. Господь дати поспешит и поможет. Аминь.

Се же везде по соборах братских тако же да ся исправляет, идеже сие писание дойдет, яко да познают християне, что ест наша простая восточных вера и что других отщепенцов хитрое безверие.

 

^ КО ПРОЧИТАТЕЛЮ НАЕДИНЕ СЕГО ПИСАНЯ

 

Напред тебе от тое прелести остерегаю, любимый прочитателю, да не ищеши зде хитростей слогов сплетеноречных наказания еллинскаго, але след существа правды, в ней же живот вечный затворен ест, да щупаеши, да знаеши. Не минай скорогонцем, яко пустое коло ветрное, очима пробегаючи от места на место вперед писанного, але застановляйся на ступенех, о лжи и истине реченых, судом мысльным и, увидевши, яко истинна от лжи попирается погибелными сынами, жалуй, проплач и Богу ся помоли, яко да даст всем заблуждшим на пут спасеный возвратитися и во разум истинный приити. А о собе аз и сам сведителство вам даю, яко грамматичкого дробязку не изучих, риторичное игрушки не видах, философского высокомечтателного ни слыхах. Мой ест даскал простак, але от всех мудрейший, который безкнижных упремудряет; мой даскал простак, которий рыболовци в человеколовци претворяет; мой даскал, которий простотою философы посмевает; мой даскаль, которий смирением гръдость потлумляет. Темже, если хочеш на пут збавенный улучити, послухай и, если хощеши царство небесное обрести, моцне дуфай. А если тя дух тщеславия наказания латинского преборет и сей простоте моей не уверуеши, ведаючи, запевне ведай, яко живота вечнаго не наследуеш.

 

Глава 1

ОБЛИЧЕНИЕ ДИАВОЛА-МИРОДЕРЖЦА И ПРЕЛЕСТНЫЙ ЛОВ ЕГО ВЕКА СЕГО СКОРО ПОГИБАЮЩЕГО, ОТ СОВЛЕКШАГОСЯ С ХИТРОУПЛЕТЕНЫХ СЕТЕЙ ЕГО ГОЛЯКА-СТРАННИКА, КО ДРУГОМУ, БУДУЩЕМУ ВЕКУ ГРЯДУЩАГО, УЧИНЕНОЕ

 

^ Евангелие от Матфея, глава 4.

И поят его диавол на гору высоку зело

и показа ему вся царствия мира и славу их

и глагола ему: «Сия вся тебе дам, аще, пад,

поклониши ми ся». Тогда глагола ему Исус:

«Иди за мною, сатана! Писано бо ест:

"Господу Богу твоему поклонишися и Тому

единому послужиши"».

 

Вопрос. Тут теды, коли ся звытязство над прелестию твоею, сыну геенский, от Христа Избавителя стало и смертию конечно царство твое лукавое мира сего обнажено и показано (через веру и крещение во имя Отца и Сына и Святого Духа) всему свету ест, пытаю тя, як будеш зас тое гнездо миролюбия в верных и крещеных вити и основание неверия языческаго фундовати.

^ Отповед прелестника диавола-миродержца. Сталося звытязство от Христа над царством моим, признаваю, але от облеченых в имя Его зовемых християн мало и велми мало, и то еще от свежей памяти по вознесении Его на небеса чяст некая, тою теплотою веры разждеженная, негде-негде от рода христианского за звытяжство моего царства обралася. А нынешнего веку зась в клюбу неверия пръваго зовемое християнство впало, и одным способом с поганци некрещеными мир любят и царства и роскоши его насытитися прагнут и еще болше нежели погане похоти телесные своволного и нечистого жития своим злым житием исполняют. А што пытаеш, якобы по Христове звытяжстве миролюбием во христианстве вшрубоватися есми мел, а тое пытати не треба. Таковою ж хитростию, прелестию, мечтанием и усоложением блеску и красоты света того, яко же и прежде пришествиа Христова. Ибо Христос образ толко побеждати хотящим мира дал, показал и научил и сам собою изобразил, прелести же моего лживого царства мне не отнял и не погубил, ато для того учинил, абы самовластие человеческое в том искусе, борбе и пробе века того настоящаго досведчалося, очищалося и на живот вечный исполеровало. Але вижу, мало ся их обирает и знаходит на той тесный гостинец хотячих и любячих ходити; ти ж все пали и поклонилися славе, царству, красоте и любви века того настоящаго, мною владомого. От началных и до последних, от духовно зовемых и до простых, от властей и до подручных — все полюбили тот мечт, блеск и пестроту красоты царства моего мирскаго, которую есми на горе Христови обнажил и показал. И все нынешнего века до того моего царства розум, мысль, любов сердечную и всю крепость телесную привязали, прилепили и приспоили, сут так моцно, иж их только смерт, от Бога посланная, от любве моего царства розлучити может, а другое ничтоже. И зась тоеж мовлю и показую, што при Христе мовилем и показовал: хто чого ищет у мене, миродръжца, аще, пад, поклониши ми ся, вся тебе дам.

^ Вопрос. Што ж ми даеш, диаволе? Именуй, да знаю наперед.

Ответ. Дам ти нынешнего века славу, роскош и богатство. Если хочеш быти преложоным, духовно зовомом, от мене ищи и мне угоди, а Бога занедбай; бо от того не леда як таковые достойнства дарованы бывают, а я скоро тобе дам. Если хочеш бискупом быти, пад, поклони ми ся, я тобе дам. Если хочеш арцибискупом быти, пад, поклони ми ся, я тобе дам. Если хочеш кардиналом быти, пад, поклони ми ся, я тобе дам. Если хочеш папежем быти, пад, поклони ми ся, я тобе дам. И другим всем, меншим преложенствам, пробощствам и поповствам в приходех и наданях, не так гойных и богатых, прагнучии, падши, поклонете ми ся, я вам дам. И до вас, мирское власти и титулу земного моего царства прагнучим, тое ж мовлю, аще, падши, поклоните ми ся, я вам вся сия прагненнаа вами подам. Если хочеш войским, подкоморим или судиею быти, пад, поклони ми ся, я тобе дам. Если хочеш кашталяном быти, пад, поклони ми ся, я тобе дам. Если хочеш старостою быти, пад, поклони ми ся, я тобе дам. Если хочеш воеводою  быти, пад, поклони ми ся, я тобе дам. Если хочеш гетманом или канцлером быти, пад, поклони ми ся, я тобе дам, буди досконалый угодник мой, я тобе дам. Если хочеш королем быти, обещайся мне на оферу в геенну вечную, я тобе и королевство дам. И другим всем меншим дикгнитарствам и преложеньствам тое ж мовлю, аще, пад, поклоните ми ся и чого попрагнете от земных и дочасных, я вам дам. Тако ж и до вас, простых и неславных во моем царстве, мовлю: Аще, падши поклоните ми ся, знайду я по вашей мере и простоте чим вас обогачу и в прелест моего века уплутаю. Если хочеш идолопоклонником, сребролюбцем и лихоимцем быти, я тебе мытником, купцем и карчмарем учиню; там твою волю и прагненя забавлятися, доколя здохнеш, привяжу и моцно до самого исхода, не мылячися с помыслом от лихоимства отодрати прикую. Если хочеш хитрцем, майстром, ремесником рукоделным быти и других вымыслом превозыйти, чим бы еси и от сусед прославитися и грошики собрати могл, пад, поклони ми ся, я тебе упремудрю, научу, наставлю и в досконалост твоего прагненя мысл твою приведу. Если хочеш похоти телесное насытитися и господарем дому, древа и земле шмата назватися, пад, поклони ми ся, я твою волю исполню, я тобе жену приведу, хату дам, землю дарую, тое ярмо на твою шию повешу и твою мысль в беде, неволи, скорби, мятежи, попечении, фрасунку и уставичном промысле погребу, я тебе стражу, слугу, неволника и вязня жене учиню, я тобе всю мысль у жоны похотное студне привяжу, толко поищи, попрагни и мне ся поклони, вся сия аз тобе дам.

^ Ответ странника от лица всех прелщаемых от диавола. Вем, диаволе, як ты все тое реченное даси, если ся тобе поклоню, але пойду искати и в зерцале учения Христова глядети, тая твоя данина на пожиток ли или на погибел вечную будет, на славу ли или на безчестие вечное ся превратит, на долго ли или на малый час ся в руках попестует, а потом з дароносцем посполу знагла погибает и ищезает. Даси ми, дияволе, быти папежем, кардиналом, арцибискупом и другим некоторым духовного стану именоносцем, але што за пожиток с того дарованя, коли от тебе диавола, за гордост с небесе на дол зверженного, тое достоенство прииму, а не от небесного Бога, которий велми заслужоным и от Духа Святого посвященным таковые преложенства стану духовного даровати звыкл, а не тым, которые, як пси встеклые, бегают, ищут, да стан духовный или имение оного угонят и поимают. Што за пожиток с того дару, коли я сам и от тебе, диявола, того попрагнул и поискал, а не Бог небесный мене на тое достоинство везвал и избрал. Што ж за пожиток с того духовенства, коли я горшей поганца злое и нечистое житие прохожу и в калу чревное похоти и сластолюбия ся валяю. Што ж за пожиток с того священства, коли я имени святости не знаю и с иноверци ровно мудростию, образом и житием ся знахожу. Што ж за пожиток с тое власти пастырское, коли я раб, неволник и вязень вечный грехови ест есми, за который в геену вечную отиду. Што ж за пожиток с тое дочасное славици, коли я вечне посоромочон буду. Што ж ми за пожиток с тое малое роскоши, коли я во веки в огни печи и скважитися буду. Што ж ми за пожиток с тых сел, и имений, и богатства великого, коли я наг и гол, без всего того, в пекле седети буду. Прето ведай о том, диаволе, иж я поповского преложенства и стану от вышняго и до последнего стопня, от тебе дарованного, не прагну и тобе ся поклонити не хочу. Господу Богу ся единому поклоню и тому единому послужу. Иди за мною, сатана! Даси ми зась, диаволе, быти кролем, канцлером, гетманом, воеводою, старостою, кашталяном и другим некоторым дикгнитаром и преложоным власти мирское твоего дияволского царства. Што ж за пожиток с того твоего дарованого поганского началства, коли я христианство страчу и живота вечнаго отпаду. Што ж ми за пожиток с того твоего мирского титулу, коли я царства небесного титул погублю. Што ж ми за пожиток с того голоса кролевства, канцлерства албо воеводства, коли я сыновство Божие страчу, безсмертный титул. Што ж ми за пожиток с твоее малое славицы временное тытулку и гнилых и суетных уст хваления, коли я от Божое вечное славы отвръжен буду, титул помазаньства Божия погублю и похвалы ангельских уст отпаду. Я теды, диаволе, таковое власти и титулу от тебе не ищу, тобе ся поклонити не хочу. Господу Богу единому ся поклоню и Тому единому послужу. Иди за мною, сатана! Даш ми зась, дияволе купцем, лихоимцем, мытником и карчмаром быти, да тым лихоимством и упражнением розум свой погребу и ослеплю. Што ж за пожиток с того твоего дару, коли света истинны науки слова Божия видети не могу и вкусити сладости его ся не сподоблю. Прето да знаеши, дияволе, як я от тебе того идолопоклонного титулу и забавы жития моего в нем не требую, тобе ся не поклоню. Господу Богу единому поклонюся и Тому самому послужу. Иди за мною, сатана! Даш ми зась, диаволе, ремесльником хитрым и славным быти, да межи соседы славнейшим, годнейшим и честнейшим быти, грошики собе зберу, фолварки покуплю, домок приоздоблю. Што ж за пожиток с того всего твоего дарохитрства, коли я простоты Исусовы навыкнути не могу. Што ж ми за пожиток з славы и чести суседское, коли я в лику пророк, патриарх, апостол, мученик и добре Богу угодивших славитися не буду. Што ж ми за пожиток з многих фолварков и оздоб домку, коли я красных дворов горняго Иерусалима не узрю и не во едином кутику в оном посидети не сподоблюся. Прето я от тебе, дияволе, тое майстореи славы и чести не требую, грошиков збирати, фолварков и домков куповати не хочу, тобе ся не поклоню. Господу Богу единому поклонюся и Тому самому послужу. Иди за мною, сатана! Даш ми зась, диаволе, убогому и неславному человеку, утеху и похот телесную, жону, даш ми домок и землицю, даш ми смуток и беду, да свой розум в той забаве, фрасунку и стараня домового, земленного и женского погребу. Што ж за пожиток с тое утехи и похоти телесное, коли я Утешителя Духа Святого витати во своем кгмаху сердечном николи ся не сподоблю. Што ж за пожиток с тое жоны, коли я Христа, Жениха, своей ложници сердечной пришедшаго упокоитися и спочинути, видети не могу. Што ж ми за пожиток с того домку, коли я в палацу небесного места Иерусалима седети не буду. Што ж за пожиток с тое малое землици и кгрунтику, коли сторичное заплаты, реченное Христом в царствии небесном за оставление сих, не прииму и живота вечного наследником и дедичем быти не могу. Прето да знаеш, диаволе, як я от тебе жоны, дому, земли дочасное не прагну, тобе поклонитися не хочу. Господу Богу, во Троици славимому, поклонюся и Тому единому послужу ныне, все время житиа моего и во веки веком. Аминь. Иди за мною, сатана, изчезни и пропади сам и з царством своим прелестным! Аминь.

 

Глава 2

БЛАГОЧЕСТИВОМУ ГОСУДАРУ ВАСИЛИЮ КНЯЖАТИ ОСТРОЗСКОМУ И ПРАВОСЛАВНЫМ ХРИСТИАНОМ МАЛОЕ РОССИИ, ТАК ДУХОВНЫМ ЯК И СВЕТСКИМ, ОТ ВЫШШОГО СТАНУ И ДО КОНЕЧНАГО. БЛАГОДАТЬ МИЛОСТЬ, МИР И РАДОСТ ДУХА СВЯТОГО В СЕРДЦА ВАША СВЫШЕ НИЗПОСЛАТИСЯ ВАМ ОТ ТРЕИПОСТНОГО БОЖЕСТВА ОТЦА И СИНА И СВЯТОГО ДУХА ИОАН МНИХ 3 ВИШНЕ ОТ СВЯТОЕ АФОНСКОЕ ГОРЫ УСЕРДНО ЖЕЛАЕТЬ

 

Проходилемся мыслию, вместо прохажки, во отповедной книжце, от вас, православных, на собор выданную книжку противко вас в Берестию через того то помененого дееписа, и веделем почръпало мысли разума его, от которого источника или студне, тот выналезок чръплючи, зас в воздух тщегласие тое (мнимаючи вас ухватити тыми словы и безсилными вымыслы) отрыгнул. Але чем же вас, правоверных, тою сетию умотати не могл? Мнемаю тым, иже не от тое силы и хитрости премудрости Божее тая сеть словес его уплетена была, што Петрова; оного бо скоро годных на жизнь вечную хватала, а сего не могла. Ато тым, вижу, ся так стало, иж тую сет от гнилого паздеря, или паучины, помысл своих (а не от Духа Святого разума на уловление вас, правоверных) уткал; для того и розодратися скоро без пожитку мусела. Если ж и похвалится, як инших много половил или прелстив, — половил, вем, але не на живот, но на погибел вечную годных. И зас: тая студня, или источник, не тот был, от которого чръпал, которий пивших если и мало еднак велми так наполняет, иж мусят его в розпущение рек других (на утолене жажды иньшим) испустити, але был источник скудный и толико нищий, от которого пиющие и своее жажды угасити не могуть, поготову других прагнене утолити силы не мают. И зас: мусит быти, иж вы уперед Петрова истиннаго лову мрежею словес Духа Святого уловлени, як гнилаа сеть гнилых словес к вам моци пристати не мела. И зас: мусит быти смрад воне тое нечистое воды, от студне злого и прелестного мудрования испущеное, ваши чистое веры сумненя скоро ощутили и почули, як не возмог дышущий духови своему гнезда в сердцах ваших уфундовати или основати. Але што мовити много, благодарю Бога за твердость и сталость вашу, благодарю за статечност и учтивость, учтивост, мовлю, которую ко Богу вцеле цноты паненства веры своее без всякое змазы и приганы заховуете, што, Боже, дай, абысте и до конца заховали, зычу.

В той тогды прохажце мысленой тое книжки знашол есми яму глубокую, которая адовых последних концов досягает; таа яма, которую духозрители пропастию вечною называют; тот ров знашол есми, которий изрывши его сам же в него ся вметает; тую глубину знашол есми, с которой погрязнувший николи же верьнутися не может. Которий же то мененый ров, яма, глубина, пропаст? То ест превозлетающиа мниманем вышше, знаходящая же ся искусом ниже всех, гръдост; тая гръдость, в которой препочивает века сего тайнство; тая гръдост, которая высокое чинит сердце, о котором рече премудрый, як ест пред Господем нечист; тая гръдост, которая истекает от высокого сердца и изрыгается нагло кгвалтовным языком наявно по Господем реченному, яко лукавый от своего съкровища износит лукаваа; тая гръдост, котораа от преисполнения сердечного вытискается в широко нечистые уста кгвалтом и языкоядным гласом ураняет слышащих. И что много мовити, в том глаголе виделем явного фарисея, о котором рек Избавител: Ей, не хвалися, — мовит, — есьли бы есь был такий, як ся мнимаеш, да не впадеши в тот вышемененый ров, абовем который ся взъносит, понижен будет, а который ся понижает, взъвышен будет. Тое понижение не иншее ест, толко в тот ров упадение, тое зас взъвышене не иншее ест, толко уготоване на падене. Ато чему? Для того, иж сам ся возносит, а не Бог. Униженый зас, иж сам ся подлейшим чинит, для того его Бог возносит. Тое возношение ест: который самого себе быти лепшим, годнейшим, зацнейшим и мудрейшим от других разумеет и наявно тое розумене о собе гласом изявляет. Тое взъвышене ест: которий сам собе тое привлащает, чого в моци привлащити собе не мает. Ато чуднейшее в знайденю тое ямы, в которой то панует тот гръдостный голос. И тот глас услышалем, которого изблевал асирийский ум, мовячи, яко нест избавляяй Израиля от Сенахерима, царя асирского. Подобный глас услышалем, як нест избавляяй Русь от неверия папы рымского. Виделем и рапсака кличучого, виделем езуиту, исусоругателя блюзнячого. Але, о вышнии, слыши и внуши тот глас! О праведный, покажи свою правду! О силный, покажи свою силу! О премудрий, объяви свою премудрост! О богатый, покажи свое богатство! Удиви милость свою во своих, покажи где живеши, почиваеши и упокоиваешися, — в тых ли, котории ся сами быти мнемают, или в тых, которие ся тебе соромеют и последними ся чинят? Ты ж, вем, Благий, тако отвещаеши: Аз, непостижимый и в судбах неиспытанный и неизследованный, о Сыне давно ознамил, на кого призираю. Призираю убо на смиреных, кротких, молчаливых и трепещущих Моих словес. Нехай ся не хвалит силный силою своею, богатый богатством своим, премудрий премудростию своею. Толко о том хвалячийся да хвалится, жебы Мене познати могл угождением Мне и творением повеленнаго Мною ему и исполнял суд и правду посреде земле. Абовем мое неразумное мудрейшее от человек ест, и мое недужее моцнейшее от человек ест. Я бовем безумные мира избрал, да моцных посоромлю, и от нищих, и неславного рода, и не за що разумеючогося избрал, да великих, богатых, славных и быти велико о собе розумеючихся не толко посоромлю, але и до кгрунту стлумлю и упразню. Ато для того учиню, абы ся не хвалило всякое тело предо Мною нечим земным на земли, толко Мною, и прославляючих Мене добрым житием и смирением прославлю, а ганбячих злым житием и гръдостию до конца и в веки облъжу и посоромочу.

Прийдете ж тепер все православныи християне на видение того рапсака папежского гласа! Час бовем приспел, да его на среду вытягнем и плакати над ним, як по нагле здохлом, будем, и учинем все едногласно, елици истинными християны ся зовете и спасение всех любите, тому трупови неверия папежского погреб и плачмося все по нем, як погибелию вечною умре и в адовех пропастех погребстися изволи. Труп гласа папежского невериа и гръдости, яко браны пекелные веру грецкую премогли, римское ж не премогли и премочи не могут, ато тым иж ест папа голова и наместник святого Петра. Сей есть труп того рапсака папежского гласа, нагле здохлый лежит. Подвигнете же все, милостивые, утробы свое и оплачте его: уже бо его в смирении неколи не узрите, уже в благочестие и православие неколи взъвратитися не может, уже света благовериа неколи не узрит, уже радости Отца и Сына и Святого Духа неколи ся не сподобит, уже небеснаго наследия, правоверным уготованного, во веки отлучился ест. Плачте, боголюбци, и стогнете, гледячи на того трупа, и головами кивайте, ревност любве сердечной показуючи, и охтайте по нем, поминаючи як красныи был, коли здоров был, а тепер як ся изменил, коли отрупел и бездушен стал, и мовте в собе, поглядуючи на него: «Чи не лепше было верою живым быти, нижли неверием здохнути? Чи не лепше было смирением живым быти, нежли гръдостию здохнути? Чи не лепше было в едности з нами быти и вечне жити, нижли, отлучившися от нас, нагле здохнути и погибнути? Чи не лепше было свет присносущнаго разума, православной церкви дарованный, видети, нежели ныне в тме поганских наук затворитися и умерети? Чи не лепше было, в простоте сердца хвалячи Бога, з нами посполу здоровым быти, нижели ныне, отлучившися от нас, комедийским и машкарским набоженством оболети и умрети?». И зась, обшедши глас того трупа плачучи, тые слова мовте: «Ох, ох, окаянный гласе! Чи не мовили тобе святые отци, да ся не отлучаеши от церкве, як лев диавол изшедших вон хватает. Чи не мовили тобе святии отце, да ся не отлучаеши дружины, да не вместо горняго Иерусалима в долнейший ад заблудиши? Чи не мовили тобе святии отце, да ся над всех выше не взъносиши, да ся, падши, не сокрушиши? Чи не мовили тобе святии отцы, да не яси много поганских наук снеди, да не, разумом прелестным отрувся, от Святое Тройци отлучен будеши и вечне здохнеши? Что явне видимо, ныне страждеши, мертв, наг, безобразен, убит и повръжен лежиши. Отож тобе мир зъеднал! Отож тобе гръдост зеднала! Отож тобе власт головная и началная зеднала! Отож тобе слава света сего зеднала! Отож тобе чого есь искал, то есь знайшол! Отож тобе чого ся ти хотело, тое ти ся исполнило».

Таже, погребши и оплакавши того трупа и събравшеся все зрители оного видения безобразнаго того гласа, чудуйтеся и поминайте его, яко в деях неких или давнопрошлых часех, положивши памет словес его пред собою в повести «яко брамы пекелные веру кгрецкую премогли, веру ж папежа рымского не премогли и премочи не могут», и рцете сами в собе, дивуючися тому: «О окаанный гласе! Отколя тот дух еси почръпл? Отколя тую силу отригнути еси приял? От которого учителя тое слово еси навык? От которого хитрца и мистра то еси изучил и от которого пренамудрейших мудрец того гласа слово еси слышал? Был еси в том схованю, где жизнь человеческаа розмерена? Был еси в той скарбници, где век основан и подан на службу и потребу человеческую? Был ли еси в той скарбницы, где скарбы жизни вечныя любящим Бога лежат? Был ли еси в той скарбници, где Пан свою тайну о своих прежде век урядил? Был ли еси в той скарбници где чести короны слава вечная в мере сем страждущим лежит? Был ли еси в той скарбници, где Павел слышал неизреченные беседы, которых телом обложенным и мирски живучим и мудруючим поведити и обславити не могл? От которого ты, окаанный гласе, слышал, яко веру грецкую врата адова одолели, а рымское не одолели?». Таже безбожный глас, если не схочет отповидети, мусит: «Як не от кого сего не слышал, толко от телесного мудрования а найболшей от гръдого духа, — так мнимаю. Ато тым, иж над греки турчин владеет, патриярхи патрияршество у турка купуют, в неволи рук поганских сут, волности ни единое не мают, беду тръпят, страждут, пуркгаториум в жизни сей в теле проходят, а для того брамы пекелные веру грецкую премогли быти розумею. Папежскую зас для того не премогли, мнемаю, иж папеж ест от неволе свободен, власт не от кого не купует, сам доброволне на папежство вступует, никому ся не поклоняет, ни покаряет, еще все ся ему покланяют и почитают, яко голову и наместника святого Петра, бед зас утрапеня, недостатку, скръби и вшелякого утиску в жизни сей не тръпит — оттоля вижу, иж браны пекелные веру папежскую не премогли. А за безскорбное житие учинил собе и своим папеж пуркгаториум по смръти, да ся чистит и чистят, маючи тую владност, яко голова и пан всего света».

Разсуждайте ж, православнии християне, на сей погреб мысльно зшедшиеся, тые выкриканя рапсака папы рымского тыми словы: «То ли твоя вера, рымлянине, як в мире сем славен и велик еси? То ли твоя вера, рымлянине, як над всеми връх погонити хощеши? То ли твоя вера, рымлянине, як в жизни сей чести и власти ищеши? То ли твоя вера, рымлянине, як всех под събою нижших, и безчестнейших, и убогших, и подлейших имети прагнеши? Тое если то веры брамы пекелные не премогли? Таковая ли то вера над грехом и духами поднебесными лукавыми, к ним же нам бран, по Павлу, в мире сем царствует? Не видиши ли, рымлянине, як нагло и кгвалтовне тая вера убита ест! Не видиш ли, рапсаку папин, як бранами пекелными того трупа неверия твоего проклятый диавол, миром владеющии, затворил, замкнул и на свою погибел вечную запечатовал, понеже ся ему поклонил, улакомившися на показане богатства света сего, чим и нашего Владыку искушал и отражен был! Видиши ли, рымлянине, як ты ся улакомил и прелстив! Видиши ли, як ты тую чачку красную от всего сердца, мысли и душа възлюбил и ухватил! Видиш ли, як тя тот мирский цар любовию власти света сего накормиль, отучнил и отрул, иж уж ни дыхати от гръдости не можеши, и вижу, як нагле до конца здохл еси!».

Тот теды погреб неверию папы римскаго, православнии христиане, учинивши, утвердетеся стояти в православной вере моцно и неподвижно и не убойтеся рапсака рымского папы гласа, ниже тръвожтеся на вопль и выкрикане его, але скоро на молитву ко всещедрому Богу обернетеся. Наша бо то истиннаа вера, которое и брамы пекелные не премогли и премочи не могут. Наша то истинная вера, которую блеск света сего прелстити не может. Наша то истинная вера, которую страх бед и розмаитых утрапений и смрътей устрашити не может. Наших то патриарх истиннаа вера, которие спасение своее веры в жизни сей собе купуют, по Павлу, искупующе, рече, время як дние жизни сея лукави суть живете. Нашее то веры брамы пекелные не премогли и премочи не могут. Нашее то веры подвига в жизни сей венци царства небесного уготованы суть. Нашее то веры пургаториум от бед антихристового слуги папы рымского и его угодников плывемо и очищаемося, да достойни будем по смръти со Христом вечне царствовати. Латина же будет с дияволом в геене огненой по смръти вечне ся пуркговати. Не бойтеся убо, о православнии, гласа рапсака папы рымского, мовячого: «Кто избавит Русь от прелести неверия папы рымского?». Веруйте крепко и непоколебимо и будете съгласни у вере. Ест кто нас избавит, толко к нему истинною от всего сердца припадем. Ест у нас славный звытяжця, который едным махненем 185 тисящ войска асирийского побил. Ест у нас непобедимая сила, непреступное Божество, святая единосущная животворящая и неразделимая Тройца, Отец и Сын и Святый Дух, Бог в трех ипостасех, от нас веруемый и покланяемый нами благочестно, в него же крестихомся, которий силен ест нас от пленения латинского исхитити и от прелести антихристовы веры освободити, — тому слава во веки веком амин, Ему же и вас вручаю.

 

Глава 3

БУДИ Ж ВАМ ИЗВЕСТНО ПРАВОВЕРНЫМ, ЯК СЕГО РАДИ ПОПУЩЕНИ ЕСМО В СЕЙ ИСКУС, ЗАНЕ Ж ПОЕРЕТИЧИХОМСЯ ВСИ ОБИТАЛНИЦИ МАЛОЕ РУСИИ И ОТ БОГА УСТРАНИХОМСЯ ДАЛЕЧЕ, К НЕВЕРИЮ И ЗЛОЖИТИЕ ПРИПРЯГШЕ. ТЕМЖЕ ВОЗВРАТЕМСЯ К БОГУ ПАКИ, ДА БОГ К НАМ СЯ ПРИБЛИЖИТ; ОН БО ЕСТ ВСЕГДЫ БЛИЗ, ГРЕХИ Ж НАША ДАЛЕЧЕ НАС ОТЛУЧАЮТ ОТ НЕГО. СЕГО РАДИ ПОКАЙМОСЯ САМИ В СВОИХ СЪГРЕШЕНИИХ, КОЖДО СУД СОБЕ СЪТВОРШЕ. ПОСЕМ И БЛАГОЧЕСТИЕ ПРАВОВЕРИЯ ЦЕРКВИ НАШЕЕ ТАКО ИСПРАВИТИ СОВЕТ ВАМ, ИСТИНЕН И НЕБЛАЗНЕН, ДАЮ

 

Первее да очистите церков от всяких прелестей и забобонов еретических и, без пестроты, в простоте сердца Бога хвалете; латинский смрад песней из церкви изжденете, простою же нашею песнию рускою поюще Бога благодерете. Посем до вери нашое восточное православное без всякого вонтпеня всем сердцем, душею и смыслом ся приложете, еретичество и неверие всякое от себе отвръжете. Иконное поклонение с учтивостю почитайте и в домех, идеж пребываете, образ Матере Божее с превечным Ее Младенцем на стенах в концю трапезы вашее пригвоздете. Крестом Христовым, до церкви пришедши, креститися не соромейте; абовем ныне християне Малое Русии поеретичели, як креста Христова, славы своее, на нем ж нам спасение содеяся, соромеются. И не толко в церкви, але и на трапезу седаючи, крестом ся знаменайте; если бы и латина или еретики быти с тобою ся прилучили, не соромейтеся рода прелюбоденаго жизни сея, да не посрамлени будете на вселенском позорищи, ибо нашее веры таинства увес мир вместити не может, иншее ж веры все сут прелести. На трапезе без молитвы (свински) ясти не начинайте, як же ныне оскотели есте. По наядении зас благодарение по уставу церковному творете. До церкви на правило соборное ходете и в всем по уставу церковному (ни прилагающе от своего умысла что, ни отимающе безстудием, ни раздирающе мнением) творете и по закону нашему християнскому жизнь сию проходете; еже бо Дух Святый уфундовал вместившими его усты, тамо поправы гнилых земных помысл не потреба. Евангелиа и Апостола в церкви на литургии простым языком не выворочайте. По литургии ж для зрозуменя людского попросту толкуйте и выкладайте. Книги церковные все и уставы словенским языком друкуйте.

Сказую бо вам тайну великую: як диявол толикую завист имает на словенский язык, же ледве жив от гнева; рад бы его до щеты погубил и всю борбу свою на тое двигнул, да его обмерзит и во огиду и ненавист приведет. И што некоторие наши на словенский язык хулят и не любят, да знаеши запевно, як того майстра действом и рыганем духа его поднявши творят. Ато для того диавол на словенский язык борбу тую мает, зане ж ест плодоноснейший от всех языков и Богу любимший: понеж без поганских хитростей и руководств, се ж ест кграматик, рыторык, диалектик и прочих коварств тщеславных, диавола въместных, простым прилежным читанием, без всякого ухищрения, к Богу приводит, простоту и смирение будует и Духа Святого подемлет. «Во злоковарную же душу, — рече Премудрий, — не внийдет премудрост», што ныне латинская злоковарная душа, ослепленьная и насыченная поганскими тщеславными и гордыми догматы, страждет, которая Божие премудрости и разума духовного, смирения, простоты и беззлобиа въместити никакож не можеть. Темже блюдете, православнии, от тое трутизны дети свои, зане да знаете, истинно вам мовлю, идеж дух любве сим поганским, мечетным, мира сего угодным догматом прилнет, тот запевне в вере погрешит а згола и от благочестия отпадет: што есте ныне вы явно пострадали, егда есте на латинскую и мирскую мудрост ся полакомили, тогда есте благочестие стратили, во вере онемощили и поболели и ереси породили, и в него ж крестихомся прогневали. Чи не лепше тобе изучити Часословец, Псалтыр, Охтаик, Апостол и Евангелие с иншими, церкви свойствеными, и быти простым богоугодником и жизнь вечную получити, нежели постигнути Аристотеля и Платона и философом мудрым ся в жизни сей звати и в геенну отити? Разсуди! Мне ся видит, лепше ест ани аза знати, толко бы до Христа ся дотиснути, который блаженную простоту любит и в ней обитель собе чинит и там ся упокоивает. Тако да знаете, як словенский язык пред Богом честнейший ест и от еллинскаго и латинскаго. Се же не басни сут. По ныне о том довод широкий чинити места не маю, абовем о очищении церкве нашей православной ся реч зачала и далей точити будет.

На священический степен по правилох святых отец да восходят, а не по своих волях, похоти плотское ради, имения и панства сан да въсхищают. И всякого такого, котрий сам наскакует, не приимуйте и от короля данного без вашего избрания изжденете и проклинете: не в папежа бо вы крестилися и не в королеву власт, да вам дает волки и злодеи, разбойники и антихристовы таинники. Лепше бо вам без владык и без попов, от диавола поставленых, до церкви ходити и православие хранети, нежели с владыками и попами, не от Бога званными, у церкви быти и с тое ся ругати, и православие попирати. Не попы бо нас спасут, или владыки, или митрополиты, але веры нашее тайнство православное с хранением заповедей Божиих — тое нас спасти мает. Прето вы пастыря собе такого избирайте; прежде назнаменайте неколико особ от жития и разума сведителствованных, яко сут благоговейны и правоверны, таж узаконете собе день и пост и сътворете бдение, съвокупивш